Kappingarráðið góðkent yvirtøkuna hjá P/f Magn av P/f Demich við treytum

Tann 3. apríl 2018 fekk Kappingareftirlitið fráboðan um, at P/f Magn hevði ætlanir um at yvirtaka P/f Demich. Yvirtøkan er ein liður í ætlanini hjá P/F Magn um at gerast heildarveitari innan grøna orku. Umframt at yvirtaka P/f Demich, hevur P/f Magn í umbúna at framleiða og selja streym til føroyska endabrúkaran.

Kappingarráðið hevur á fundi tann 22. august 2018 góðkent yvirtøkuna hjá P/f Magn av P/f Demich við ávísum treytum. Góðkenningin er treytað av bindandi tilsøgn, ið P/F Magn hevur latið kappingarmyndugleikanum. Í stuttum kann sigast um tilsøgnina, at P/f Magn vil geva seg undir, at Kappingareftirlitið skal góðkenna átøk, har felagið bindir ella buntar vørur hjá P/f Magn við vørur hjá P/f Demich, og í teimum førum, har sáttmálar binda kundan longri enn 1 ár.

Les avgerðina hjá Kappingarráðnum her.